Cупрацоўнікі Інстытута мовазнаўства імя Якуба Коласа – вядучы навуковы супрацоўнік аддзела сучаснай беларускай мовы кандыдат філалагічных навук Вікторыя Іванаўна Уласевіч і вядучы навуковы супрацоўнік аддзела гісторыі беларускай мовы кандыдат філалагічных навук Эльвіра Валер’еўна Ярмоленка прынялі ўдзел у рабоце журы трэцяга этапу рэспубліканскай алімпіяды па вучэбных прадметах “Беларуская мова” і “Беларуская літаратура” за 2025/2026  навучальны год у Мінску, які праходзіў  13–15 студзеня 2026 г. на базе ДУА “Гімназія № 14 г. Мінска”.

НАВАГОДНЯЕ ВІНШАВАННЕ>>> 

Дырэктар Інстытута мовазнаўства імя Якуба Коласа І.Л. Капылоў прыняў удзел у навукова-практычнай канферэнцыі “Манголазнаўства ў Еўразіі 2025 – Запаветнае сказанне манголаў”, прымеркаванай да Дня нацыянальнай свабоды і аднаўлення незалежнасці Манголіі. Мэта канферэнцыі – азнаямленне з гісторыяй і культурай манголаў, абмен вопытам у сферы перакладу замежнай літаратуры на беларускую/рускую мовы. Падчас канферэнцыі Ігар Лявонавіч сустрэўся з  Надзвычайным і Паўнамоцным Паслом Манголіі ў Рэспубліцы Беларусь Батсуха Баярсайханам і саветнікам пасольства Ад’яа Гэрэлмаа і абмеркаваў перспектывы беларуска-мангольскага супрацоўніцтва ў галіне мовазнаўства.

Дырэктар Інстытута мовазнаўства імя Якуба Коласа І.Л. Капылоў  прыняў удзел у творчай сустрэчы ў межах праекта «Літаратурны алімп Беларусі». Сустрэча прайшла ў Нацыянальнай бібліятэцы Беларусі і была прысвечана творчасці пісьменніка, журналіста, тэлевядучага і радыёвядучага, заслужанага дзеяча культуры Беларусі Навума Гальпяровіча. Навум Якаўлевіч прэзентаваў сваю новую кнігу «Чырвоны мост» і расказаў пра творчую дзейнасць. Ігар Лявонавіч у сваім выступленні распавёў пры лірызм, філасофію і вобразнасць вершаў паэта, гармонію і глыбіню сэнсаў празаічных твораў,  асобна акцэнтаваў увагу на моўнае майстэрства.

У межах Дагавора аб супрацоўніцтве паміж Цэнтрам даследаванняў беларускай культуры, мовы і літаратуры Нацыянальнай акадэміі навук Беларусі і гімназіяй з беларускай мовай навучання № 23 г. Мінска 17 снежня 2025 г. галоўны навуковы супрацоўнік аддзела гісторыі беларускай мовы доктар філалагічных навук Мароз Валянціна Канстанцінаўна для навучэнцаў 8-х класаў прачытала лекцыю на тэму: «Мілагучнасць беларускай мовы».

Савет маладых вучоных Інстытута мовазнаўства імя Якуба Коласа правёў сустрэчу, прысвечаную падвядзенню вынікаў працы за 2025 год. Падчас мерапрыемства былі абмеркаваны асноўныя напрамкі дзейнасці Савета, дасягненні маладых даследчыкаў, а таксама перспектывы навуковай і арганізацыйнай работы на наступны перыяд. Удзельнікі сустрэчы падзяліліся ўражаннямі ад рэалізаваных ініцыятыў і выказалі прапановы па далейшым развіцці маладзёжнай навуковай супольнасці інстытута.

Напрыканцы сустрэчы члены Савета павіншавалі адзін аднаго з надыходзячымі святамі, пажадалі творчых поспехаў, навуковых дасягненняў і плённай працы ў новым годзе.

Дырэктар Інстытута мовазнаўства імя Якуба Коласа І.Л. Капылоў  правёў сустрэчу з дэлегацыяй кітайскіх вучоных-мовазнаўцаў (Паўночна-заходні політэхнічны ўніверсітэт, Сіань), падчас якой былі абмеркаваны перспектывы беларуска-кітайскага супрацоўніцтва. Кітайскіх калег зацікавілі вынікі дзейнасці аддзела дыялекталогіі і лінгвагеаграфіі, а таксама сектара камп'ютарнай лінгвістыкі. Выкладчыкі Паўночна-заходняга політэхнічнага ўніверсітэта выказалі жаданне ажыццяўляць сумесныя праекты, звязаныя з распрацоўкай электроннага семантычнага тэзаўруса  і стварэннем двухмоўных корпусаў.  

19 снежня ў Інстытуце мовазнаўства адбыўся круглы стол, прысвечаны праблемам перакладу юрыдычных дакументаў на беларускую мову. Удзельнікі мерапрыемства абмеркавалі асноўныя тэндэнцыі развіцця беларускай юрыдычнай тэрміналогіі на сучасным этапе, пытанні адаптацыі іншамоўных тэрміналагічных адзінак, а таксама праблемы іх упарадкавання і ўніфікацыі.

Вядучы навуковы супрацоўнік аддзела гісторыі беларускай мовы Інстытута мовазнаўства імя Якуба Коласа, кандыдат філалагічных навук Э. В. Ярмоленка 18 снежня прыняла ўдзел у семінары-практыкуме “Атрыбуцыя рукапісных, старадрукаваных і рэдкіх кніг”, які прайшоў у бібліятэцы імя мітрапаліта Філарэта (Вахрамеева) Мінскай духоўнай акадэміі. Мерапрыемства праводзілася з мэтай рэалізацыі Праграмы супрацоўніцтва паміж Міністэрствам культуры Рэспублікі Беларусь і Беларускай Праваслаўнай Царквой на 2024–2026 гг., а таксама ў рамках стварэння “Рэестра кніжных помнікаў Беларускага Экзархата Маскоўскага Патрыярхата”.