Інстытут мовазнаўства імя Якуба Коласа запрашае на творчую сустрэчу з галоўным рэдактарам навуковага і метадычнага часопіса «Роднае слова» Наталляй Мікалаеўнай Шапран.
23 сакавіка ў 12:00
г. Мінск, вул. Сурганава, 1/2, аўд. 302
Часопіс «Роднае слова» – беларускамоўнае выданне, якое штомесяц прэзентуе самыя актуальныя навуковыя даследаванні ў галіне філалогіі, мастацтвазнаўства, культуралогіі і педагогікі. Амаль чатыры дзесяцігоддзі часопіс аб’ядноўвае пакаленні знаўцаў і аматараў беларускай культуры, мовы і літаратуры.
У межах сустрэчы адбудзецца прэзентацыя супольнага асветніцкага праекта часопіса «Роднае слова» і Цэнтра даследаванняў беларускай культуры, мовы і літаратуры НАН Беларусі «Пакуль ты ёсць – працяг наш будзе віцца», прымеркаванага да Года беларускай жанчыны.
Падчас сустрэчы плануецца абмеркаванне наступных пытанняў:
- што дапытлівы чытач можа ўбачыць у «люстэрку» «Роднага слова»;
- чым выданне адрозніваецца ад іншых навуковых і культурна-асветніцкіх СМІ;
- чаму ў анонсах часопіса часта з’яўляюцца словы «эксклюзіў» і «сенсацыя»;
- чаму сакавіцкі нумар традыцыйна вылучаецца асаблівай атмасферай натхнення;
- як у паўсядзённасці адкрыць для сябе «код прыгажосці».
Да ўдзелу запрашаюцца супрацоўнікі навуковых устаноў, выкладчыкі, студэнты, настаўнікі, а таксама ўсе, хто цікавіцца праблемамі беларускай мовы і культуры.
Уваход вольны.
