21 лютага 2025 г. загадчык аддзела гісторыі беларускай мовы ДНУ “Цэнтр даследаванняў беларускай культуры, мовы і літаратуры Нацыянальнай акадэміі навук Беларусі” Н.В. Паляшчук прыняла ўдзел у святкаванні Міжнароднага дня роднай мовы ў дзяржаўнай установе адукацыі “Гімназія № 22 г. Мінска”.
Для старшакласнікаў гімназіі яна падрыхтавала і правяла навукова-папулярную лекцыю, прысвечаную беларускай пісьмовай спадчыне, яе захаванні і папулярызацыі.
Наталля Вікенцьеўна расказала пра пераклады на беларускую мову Евангелляў, першую друкаваную кнігу дзелавога зместу на беларускай мове – “Трыбунал абывацелям Вялікага Княства Літоўскага”, адметнасці Статутаў Вялікага Княства Літоўскага і “Катэхізіса” Сымона Буднага.
Таксама яна пазнаёміла прысутных з гісторыка-лінгвістычнымі слоўнікамі, з дапамогай якіх можна зразумець старажытныя тэксты, лепш даведацца пра разнастайныя бакі жыцця нашых продкаў, а таксама атрымаць карысную інфармацыю пра гісторыю слоў нашай мовы. У прыватнасці, вучні даведаліся, што слова артыкулъ упершыню пісьмова было зафіксавана ў 1388 г., канцлеръ – 1401 г., таваръ – 1478 г., сума – 1496 г., канцелярия – 1503 г., ботъ – 1516 г., гандаль – 1566 г., комерцыя – 1686 г., калькуляторъ – 1689 г., тарыфъ – 1711 г.
У канцы лекцыі гімназісты прынялі ўдзел у віктарыне “Па старонках гісторыі роднай мовы”.
Н. Паляшчук
