18 лютага 2025 г. у Цэнтральнай дзіцячай бібліятэцы імя Мікалая Астроўскага г. Мінска загадчык аддзела гісторыі беларускай мовы Наталля Вікенцьеўна Паляшчук правяла прэзентацыю новай кнігі “Беларуская мова ад А да Я”.
На мерапрыемстве прысутнічалі вучні 8 Б класа СШ № 67 г. Мінска, супрацоўнікі Цэнтральнай дзіцячай бібліятэкі імя Мікалая Астроўскага – намеснік дырэктара Алена Уладзіміраўна Чарняўская і загадчык сектара аддзела абслугоўвання Алена Яраславаўна Туміловіч (яна выступіла вядучай прэзентацыі), а таксама загадчык дзіцячай бібліятэкі № 5 г. Мінска Вераніка Міхайлаўна Юч.
Н.В. Паляшчук пазнаёміла прысутных са зместам кнігі і тэматычнай разнастайнасцю яе матэрыялаў, рубрыкамі “Трэба ведаць!”, “Слова да слова – будзе мова”, выказваннямі і вершамі пра родную мову. Расказваючы пра падзеі ў развіцці і вывучэнні беларускай мовы, адлюстраваныя на стужцы часу (ахоплівае перыяд амаль у 800 гадоў), яна засяродзіла ўвагу на выданнях буквароў у XVII, XX, XXI стагоддзях, выдавецкай дзейнасці Васіля Цяпінскага, лексікаграфічнай працы Язэпа Драздовіча. Слухачы таксама даведаліся пра беларускую жэставую мову, узнікненне тэрміна трасянка, падрыхтоўку новых слоўнікаў у Інстытуце мовазнаўства імя Якуба Коласа, прыгадалі дыялектныя і ўстарэлыя словы, неалагізмы, растлумачылі значэнне фразеалагізмаў.
Завяршылася прэзентацыя віктарынай “Па старонках кнігі «Беларуская мова ад А да Я»”. На прапанаваныя пытанні – а іх было 15 – вучні адказалі з лёгкасцю і задавальненнем.
Н. Паляшчук
