20 лютага на базе Беларускай натарыяльнай палаты прайшоў інтэлектуальны конкурс, прымеркаваны да Міжнароднага дня роднай мовы. У мерапрыемстве прынялі ўдзел натарыусы і адвакаты з розных абласцей Беларусі. У якасці членаў журы выступілі прадстаўнікі натарыяльнай палаты і супрацоўнікі Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі – Торчык Карына Віктараўна і Гоцка Дзіяна Уладзіміраўна.
Мэта правядзення конкурсу - стымуляванне жадання размаўляць па-беларуску, развіццё інтарэсу да беларускай культуры і павышэнне ўзроўню патрыятызму.
Гульня прайшла ў шэсць этапаў: “Размінка”, “Дзе логіка?”, “Сымон-музыка”, “Ты ж юрыст”, “Адгадай-ка” і “Бліц”. Для абмеркавання кожнага пытання і запісу адказу адводзілася толькі адна хвіліна.
У ходзе інтэлектуальнай гульні ўдзельнікі змаглі прадэманстраваць не толькі крэатыўнасць, кемлівасць і прафесійную экспертнасць, але і шчырую зацікаўленасць да роднай мовы.
