У Міжнародны дзень роднай мовы супрацоўнікі аддзела гісторыі беларускай мовы – загадчык аддзела Наталля Вікенцьеўна Паляшчук і вядучы навуковы супрацоўнік Эльвіра Валер’еўна Ярмоленка – наведалі інспекцыю Міністэрства па падатках і зборах г. Мінска, дзе прачыталі навукова-папулярную лекцыю “З гісторыі роднага слова”.
Н.В. Паляшчук засяродзіла ўвагу прысутных на асаблівасцях старабеларускай мовы, расказала аб помніках беларускай пісьменнасці (копіі старонак некаторых з іх дэманстраваліся на экране), іх захаванасці і магчымасцях аматараў даўніны азнаёміцца з імі. Другая частка яе выступлення была прысвечана “Гістарычнаму слоўніку беларускай мовы” як адной з важнейшых крыніц вывучэння беларускага слова XIV–XVIII стст. Наталля Вікенцьеўна адзначыла і абгрунтавала вартасць гэтага выдання найперш для карыстальнікаў без спецыяльнай гісторыка-лінгвістычнай падрыхтоўкі.
Э.В. Ярмоленка прапанавала слухачам звесткі з гісторыі старабеларускіх назваў падаткаў і плацяжоў, а таксама назваў асоб, якія збіралі іх, прывяла цытаты з помнікаў пісьменнасці, дзе гэтыя словы зафіксаваны, а для лепшага запамінання інфармацыі нават падабрала ілюстрацыю з выявай збору пошлін у даўніну. Супрацоўнікі інспекцыі для некаторых з пачутых старабеларускіх найменняў стараліся знаходзіць адпаведнікі сярод назваў сучаснай падатковай сістэмы.
Напрыканцы сустрэчы, якая прайшла ў цёплай і прыязнай атмасферы, інспектары паспрабавалі прачытаць невялікі ўрывак з “Аповесці пра Трышчана”, а таксама паўдзельнічалі ў віктарыне, што дало ім магчымасць абагульніць атрыманыя звесткі па гісторыі роднага слова
Н.В. Паляшчук і Э.В. Ярмоленка з арганізатарамі мерапрыемства абмеркавалі шляхі далейшага супрацоўніцтва.
Н. Паляшчук, Э. Ярмоленка
