19 лютага 2025 года ў Цэнтры даследаванняў беларускай культуры, мовы і літаратуры НАН Беларусі ў фармаце пляцоўкі адкрытых камунікацый, прысвечанай Міжнароднаму дню роднай мовы, адбылася творчая сустрэча акадэмічных вучоных-мовазнаўцаў з беларускімі пісьменнікамі. Прысутнічалі таленавітыя майстры слова: Навум Гальпяровіч, Зіновій Прыгодзіч, Рагнед Малахоўскі, Леанід Крыванос, Уладзімір Мазго, Аляксандр Піскуноў, а таксама першы намеснік старшыні Саюза пісьменнікаў Беларусі Алена Стэльмах, дырэктар Цэнтралізаванай сістэмы дзіцячых бібліятэк г. Мінска Таццяна Швед і загадчык 16-й дзіцячай бібліятэкі Вольга Ціткова.
Прадстаўнікі тэлеканала “Беларусь-3” узялі інтэрвью ў Навума Гальпяровіча і дырэктара Інстытута літаратуразнаўства імя Янкі Купалы, прафесара, члена Саюза пісьменнікаў Беларусі Івана Саверчанкі.
З вітальным словам да прысутных звярнуўся дырэктар Інстытута мовазнаўства імя Якуба Коласа Ігар Капылоў, які расказаў пра вынікі навуковых даследаванняў у галіне беларускага мовазнаўства, пазнаёміў прысутных з новым выданнем - «Беларуская мова ад А да Я», дзе ў папулярнай форме пададзена лента часу развіцця нашай мовы, яе адметныя рысы, прыведзены цікавыя моўныя факты, выказванні паэтаў
і пісьменнікаў пра роднае слова, самабытная лексіка, прыказкі, вытрымкі перакладаў Бібліі і іншыя цікавыя звесткі.
Падчас сустрэчы была арганізавана выстава выданняў Інстытута, чыталіся вершы, абмяркоўваліся пытанні зацікаўлення дзяцей і падлеткаў каштоўнасцямі слова.
Пасля афіцыйнай часткі гасцей запрасілі наведаць Музей старажытнабеларускай культуры Інстытута мастацтвазнаўства, этнаграфіі і фальклору імя Кандрата Крапівы. Загадчык аддзела старажытнабеларускай культуры Барыс Лазука правёў змястоўную экскурсію па розных аддзелах музея, раскрыў тонкасці працы па пошуку і рэстаўрацыі работ, падкрэсліў адметнасці беларускага касцюма і побыту сялян і гараджан розных часоў і мясцін Беларусі.
