19 лютага 2025 г. у Інстытуце мовазнаўства імя Якуба Коласа адбылася сустрэча са студэнтамі і слухачамі Акадэміі кіравання пры Прэзідэнце Рэспублікі Беларусь, прымеркаваная да Міжнароднага дня роднай мовы. На сустрэчы прысутнічалі таксама загадчык кафедры моўнай камунікацыі дадзенай установы А.І. Міцкевіч і метадыст Л.У. Круглік.
Перад прысутнымі выступіў дырэктар інстытута І.Л. Капылоў, які расказаў пра гісторыю навуковай установы, асноўныя напрамкі дзейнасці аддзелаў і яе вынікі, што знайшлі сваё адлюстраванне ў шматлікіх слоўніках, даведніках і атласах. Ігар Лявонавіч засяродзіў увагу на працэсах, якія сёння адбываюцца ў сусветнай моўнай прасторы, і, у прыватнасці, на знікненні нацыянальных моў. “Нават калі адна мова страчваецца – гэта страта для цэлага чалавецтва. Бо што такое мова? У мове закладзены культурны код нацыі-носьбіта, духоўны пачатак фарміравання нацыі” – адзначыў І.Л. Капылоў. У сувязі з гэтым ён падкрэсліў важнасць захавання і шанавання духоўнага скарбу нашай дзяржавы і нашага народа – роднай мовы, адзначыўшы пры гэтым, што моўнае асяроддзе кожны з нас стварае сам. Ігар Лявонавіч звярнуў увагу і на неабходнасць дасканалага валодання беларускай мовай спецыялістамі розных сфер дзейнасці, асабліва тымі, якія займаюць кіруючыя пасады.
Як адзін з аўтараў, І.Л. Капылоў прэзентаваў новую кнігу “Беларуская мова ад А да Я”, у якой у папулярнай форме даюцца звесткі пра важныя этапы развіцця нацыянальнай мовы, яе адметныя рысы, знакавыя пісьмовыя помнікі, сучасныя слоўнікі і электронныя рэсурсы. Ён пазнаёміў гасцей са зместам выдання, назваў моўныя факты і колькасныя даныя, якія характарызуюць месца і ролю беларускай мовы ў свеце.
У дадзеным мерапрыемстве прыняў удзел галоўны рэдактар газеты “Навука” С.У. Дубовік. Ён падзяліўся з прысутнымі вопытам стварэння песень на беларускай мове пры дапамозе нейрасетак. Падчас інтэрактыву былі прадэманстраваны магчымасці штучнага інтэлекту на прыкладах вершаў класікаў і сучасных паэтаў, паказаны розныя варыянты аранжыроўкі вядомых кампазіцый.
Завяршылася сустрэча цікавай экскурсіяй па залах музея старажытнабеларускай культуры.
І.У. Ялынцава, А.Г. Ванкевіч
