Супрацоўнікі аддзела сучаснай беларускай мовы В.І. Уласевіч і К.Д. Ганчарэнка выступілі на прэзентацыі вучэбнага выдання “Сучасная беларуская мова. Хрэстаматыя: у 2-х ч.” (2022–2024). Мерапрыемства прайшло на філалагічным факультэце БДУ, дзе і быў падрыхтаваны гэты дапаможнік.
Навуковыя артыкулы В.І. Уласевіч і К.Д. Ганчарэнка ўвайшлі ў розныя раздзелы хрэстаматыі.
У пачатку сустрэчы выступіла дацэнт кафедры беларускага мовазнаўства А.Л. Садоўская, якая адзначыла, што ў выданні “Сучасная беларуская мова. Хрэстаматыя” сабраны матэрыялы, якія адлюстроўваюць усе тэмы, што вывучаюцца студэнтамі на філалагічным факультэце. Сярод аўтараў – легенды мовазнаўства ХХ ст., аўтарытэтныя вучоныя-сучаснікі, прадстаўнікі больш маладога пакалення.
Загадчык кафедры беларускага мовазнаўства Г.К. Чахоўскі дадаў, што каштоўнасць выдання такога фармату ў кампіляцыі разнапланавых матэрыялаў, якія складана хутка знайсці ў бібліятэцы.
Выступленне К.Д. Ганчарэнка датычылася функцыянавання ў беларускай мове новых запазычанняў і актуальнай размоўнай лексікі. Даследчыца расказала аб сферах, якія часцей папаўняюцца іншамоўнымі адзінкамі (сферы інфармацыйных тэхналогій, грамадскага харчавання, спорту і інш.), аб спецыфіцы ўжывання канчаткаў -а (-я) або -у (-ю) у неалагізмах мужчынскага роду ў родным склоне адзіночнага ліку. Таксама ўзгадала вынікі праведзенага ёю анкетавання на прадмет выяўлення ў беларускамоўнай моладзі актыўных жаргонных і размоўных слоў, а таксама адзначыла некаторыя размоўныя адзінкі філолагаў і журналістаў. Акрамя таго К.Д. Ганчарэнка прадставіла выданні аддзела сучаснай беларускай мовы, якія выйшлі ў 2022–2024 гг.: “Граматычны слоўнік назоўніка”, “Граматычны слоўнік дзеяслова”, “Жыццёвы лёс Браніслава Тарашкевіча” і інш.
В.І. Уласевіч расказала пра лексічныя працэсы ў сучаснай беларускай мове, функцыянаванне новай лексікі, асаблівасці збору матэрыялу для неаграфічных выданняў. Яна пазнаёміла студэнтаў і выкладчыкаў са “Слоўнікам новых запазычаных слоў беларускай мовы” В.І. Уласевіч і Н.М. Даўгулевіч, які выйшаў з друку ў канцы 2023 г. У Слоўніку зафіксавана новая запазычаная лексіка, якая з’явілася ў першай чвэрці ХХІ ст. і актыўна выкарыстоўваецца ў сучаснай беларускай мове. У некаторых выпадках фіксуюцца словы, якія былі запазычаны ў больш ранні перыяд (у канцы ХХ ст.), зафіксаваны ў апошніх слоўніках беларускай мовы, але не згубілі адценне навізны ў наш час.
Свае даследаванні па сінтаксісе прадставілі таксама А.А.Радзевіч і І.Л. Бурак.
К.Д. Ганчарэнка
