17 лютага 2025 г. у Дзяржаўным літаратурна-мемарыяльным музеі Якуба Коласа адбылася прэзентацыя кнігі “Беларуская мова ад А да Я”, у якой прынялі ўдзел яе аўтары Ігар Лявонавіч Капылоў, дырэктар Інстытута мовазнаўства імя Якуба Коласа Цэнтра даследаванняў беларускай культуры мовы і літаратуры Нацыянальнай акадэміі навук Беларусі, Наталля Вікенцьеўна Паляшчук, загадчык аддзела гісторыі беларускай мовы, а таксама малодшы навуковы супрацоўнік аддзела сучаснай беларускай мовы Вераніка Дзмітрыеўна Косціна, якая ажыццявіла камп’ютарную вёрстку і дызайн кнігі.
І.Л. Капылоў ва ўступным слове расказаў пра этапы падрыхтоўкі выдання і адзначыў, што яго ідэя належыць старшыні Прэзідыума Нацыянальнай акадэміі навук Беларусі акадэміку У.Р. Гусакову.
Н.В. Паляшчук прадставіла прысутным часткі кнігі, звязаныя з гісторыяй беларускай мовы. Яна расказала пра ключавыя падзеі ў развіцці і вывучэнні нашай мовы, адлюстраваныя на стужцы часу, пра гісторыю беларускага алфавіта, назвала цікавыя факты з жыцця і дзейнасці Францыска Скарыны, Сымона Буднага, Васіля Цяпінскага, Івана Насовіча, Язэпа Драздовіча, пазнаёміла прысутных з помнікамі пісьменнасці, якія згадваюцца і здымкі якіх змешчаны ў выданні, прыгадала гісторыю перакладаў Святога Пісання на беларускую мову і гісторыю стварэння беларускіх буквароў.
І.Л. Капылоў прэзентаваў гасцям мерапрыемства блокі кнігі, прысвечаныя сучаснай беларускай мове і яе даследаванню, расказаў пра дзейнасць і асноўныя выданні Інстытута мовазнаўства імя Якуба Коласа, падкрэсліў важнасць рубрык “Трэба ведаць!” (у ёй аб’яднаны правілы арфаграфіі, пастаноўкі націску, словаўжывання), “Слова да слова будзе мова” (у яе ўключана адметная беларуская лексіка) для лепшага засваення моўных нормаў, адзначыў, што размешчаныя вершы і выслоўі пра родную мову пашыраць веды чытачоў пра беларускую літаратуру.
В.Д. Косціна падзялілася вопытам працы над афармленнем выдання, падрыхтоўкай ілюстрацый і фотаздымкаў, іх кампаноўкай, размяшчэннем тэкставых матэрыялаў і падборам для іх шрыфтоў. Яна падкрэсліла, што ўсе, хто рыхтаваў кнігу, імкнуліся зрабіць яе змястоўнай, прывабнай і зручнай для карыстання.
Прэзентацыя закончылася аўтограф-сесіяй.
Н. Паляшчук
