19 лютага 2025 г. на філалагічным факультэце БДУ прайшла лекцыя для студэнтаў-філолагаў “Фарміраванне лексічнага складу беларускай мовы ва ўмовах міжмоўных кантактаў”, арганізаваная сумесна кафедрай беларускага мовазнаўства і аддзелам славістыкі і тэорыі мовы Інстытута мовазнаўства імя Якуба Коласа.
Падчас сустрэчы супрацоўнікі аддзела славістыкі і тэорыі мовы, сектара этналінгвістыкі і фальклору і сектара ўсходазнаўства расказалі пра асноўныя напрамкі навуковай дзейнасці і асаблівасці правядзення навуковых даследаванняў.
Загадчык аддзела славістыкі і тэорыі мовы к.ф.н. Таццяна Аліферчык распавяла пра канцэпцыю і асаблівасці стварэння “Этымалагічнага слоўніка беларускай мовы”, а таксама пра распрацоўку і падрыхтоўку канкардансаў твораў К. Крапівы і беларускамоўных тэкстаў XIX ст. Акрамя таго, яна адзначыла яшчэ адзін напрамак дзейнасці аддзела – перакладазнаўчы.
Загадчык сектара этналінгвістыкі і фальклору Алена Боганева расказала пра этапы распрацоўкі і падрыхтоўку ўнікальнага выдання “Беларускі фальклорна-этналінгвістычны атлас”, першы выпуск якога плануецца выдаць у 2025 г.
Старшы навуковы супрацоўнік сектара этналінгвістыкі і фальклору к.ф.н. Ганна Алексяевіч расказала пра вяртанне пісьмовай спадчыны Беларусі і пазнаёміла студэнтаў з гісторыяй пошукаў супрасльскай рэдакцыі Вісліцкага статута 16 ст., якая доўгі час лічылася страчанай. Адзначаная рэдакцыя з’яўляецца ўнікальным рукапісным помнікам старабеларускай мовы 16 ст.
Старшы навуковы супрацоўнік сектара ўсходазнаўства к.ф.н. Ірына Сынкова пазнаёміла студэнтаў з асноўнымі напрамкамі дзейнасці сектара, а таксама расказала пра асноўныя віды рукапісных помнікаў беларускіх татар і іх гістарычную, культуралагічную, рэлігіязнаўчую і мовазнаўчую адметнасць.
У выніку сустрэча навукоўцаў і студэнтаў набыла яшчэ і прафарыентацыйную афарбоўку, паколькі навучанне ў аспірантуры Інстытута мовазнаўства імя Якуба Коласа дае магчымасць правядзення навуковых даследаванняў у якасці прафесійнай дзейнасці.
