17 лютага 2025 г. на факультэце дашкольнай адукацыі Беларускага дзяржаўнага педагагічнага ўніверсітэта імя Максіма Танка загадчык аддзела гісторыі беларускай мовы Інстытута мовазнаўства імя Якуба Коласа Наталля Вікенцьеўна Паляшчук і вядучы навуковы супрацоўнік гэтага аддзела Эльвіра Валер’еўна Ярмоленка прачыталі інтэрактыўную навукова-папулярную лекцыю «Кнігі нашых продкаў», скіраваную на азнаямленне студэнтаў з нацыянальнай гісторыка-культурнай спадчынай. Падобныя сустрэчы ўжо сталі добрай традыцыяй. Вучоныя-лінгвісты не першы раз выступаюць перад студэнтамі факультэта па запрашэнні дацэнта кафедры агульнай і дзіцячай псіхалогіі Фінькевіч Людмілы Уладзіміраўны.
Падчас свайго выступлення Наталля Вікенцьеўна расказала аб асаблівасцях ужывання кірылічных літар у беларускіх рукапісах і старадруках, прывяла цікавыя факты з гісторыі напісання розных графем, разгледзела спецыфіку афармлення літар кірыліцы з лікавым значэннем, напісання слоў пад цітлай, адзначыла змяненні, якія адбыліся ў кірылічнай сістэме пісьма да нашых дзён. Асаблівая ўвага была нададзена тром распаўсюджаным у старажытнасці тыпам пісьма – уставу, паўуставу і скорапісу, а таксама паказаны копіі старонак тэкстаў, створаных з іх выкарыстаннем.
Эльвіра Валер’еўна пазнаёміла прысутных з гісторыяй стварэння і бытавання кнігі на беларускіх землях, паказала фота аркушаў Тураўскага Евангелля ХІІ ст., Аршанскага Евангелля ХІІІ ст. і Слуцкага Евангелля ХVI ст., “Граматыкі” Лаўрэнція Зізанія 1596 г. Э.В. Ярмоленка акцэнтавала ўвагу прысутных на жанрава-стылявой прыналежнасці старабеларускіх помнікаў і расказала аб некаторых асаблівасцях помнікаў дзелавога зместу (“Трыбунал абывацелям ВКЛ”, Статут Вялікага Княства Літоўскага 1588 г. і інш.), рэлігійных тэкстаў (выданні Францыска Скарыны і інш.) і свецка-мастацкіх твораў (“Александрыя”, Баркалабаўскі летапіс і інш.).
Закончылася сустрэча адказамі на пытанні па тэме сустрэчы.
Э. Ярмоленка, Н. Паляшчук
