У рамках мерапрыемстваў, прысвечаных Міжнароднаму дню роднай мовы, 17 лютага 2025 г. адбылося падпісанне дагавора аб супрацоўніцтве паміж Цэнтрам даследаванняў беларускай культуры, мовы і літаратуры НАН Беларусі і ДУА «Гімназія № 22 г. Мінска».
Ва ўрачыстай абстаноўцы дагавор падпісалі дырэктар Цэнтра Лакотка Аляксандр Іванавіч і дырэктар гімназіі № 22 Кісель Мікалай Уладзіміравіч. На мерапрыемстве таксама прысутнічалі намеснік дырэктара гімназіі па вучэбнай рабоце Косцень Людміла Аляксееўна, старшыня метадычнага аб’яднання Сяліцкая Вольга Уладзіміраўна, супрацоўнікі арганізацый Цэнтра, вучні 5-га і 11-га класаў.
Мерапрыемствы (сустрэчы, навукова-практычныя канферэнцыі, навукова-папулярныя лекцыі і г. д.), якія будуць рэалізаваны ў межах дагавора аб супрацоўніцтве, накіраваны на пашырэнне ведаў пра беларускую мову, яе сучасны стан і гісторыю. Гэтыя мерапрыемствы таксама паспрыяюць папулярызацыі філалагічных ведаў сярод навучэнцаў устаноў сістэмы сярэдняй адукацыі.
Пасля падпісання дакумента госці Цэнтра наведалі Музей старажытнабеларускай культуры. Экскурсію для іх правёў загадчык аддзела старажытнабеларускай культуры Лазука Б.А. Барыс Андрэевіч расказаў пра беларускую культуру на розных гістарычных этапах яе развіцця, а таксама пра перспектыўныя напрамкі ў яе даследаванні. У гасцей засталося шмат прыемных уражанняў ад экскурсіі.
Леў Глушыцкі
Фота: Алена Путрыч, Алена Гардзей
