Шаноўныя калегі!
18 лютага 2025 г. у 14.00 у Цэнтральнай навуковай бібліятэцы імя Якуба Коласа адбудзецца прэзентацыі кнігі “Лексiчны атлас беларускiх народных гаворак : аналітычныя і даведачна-інфармацыйныя матэрыялы”.
Кніга ўбачыла свет у выдавецтве “Беларуская навука” ў кастрычніку 2024 г.
Працу падрыхтавала В. М. Курцова, загадчык аддзела дыялекталогіі і лінгвагеаграфіі Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры.
Гэта кніга ‒ комплекснае выданне, дзе абагульняльныя аналітычныя матэрыялы пра фундаментальны навуковы праект “Лексічны атлас беларускіх народных гаворак” спалучаюцца са звесткамі пра даследчыкаў, навуковая дзейнасць якіх была ўганаравана дзяржавай. У публікацыі расказваецца пра гісторыю стварэння працы і яе метадычнае забеспячэнне, раскрываецца змест карт, іх асаблівасці і значэнне. Кніга ўтрымлівае таксама розныя даведачна-інфармацыйныя матэрыялы, якія з’яўляюцца неабходным складнікам такіх навуковых выданняў.
Сардэчна запрашаем прыняць удзел у прэзентацыі новага выдання.
Адрас бібліятэкі: г. Мінск, вул. Сурганава, д. 15, Цэнтральная навуковая бібліятэка імя Якуба Коласа НАН Беларусі, канферэнц-зала (аўд. 110).
